Hvað gerist í Egyptalandi í Október?

Bilo segir frá því í bloggi sínu að frá og með 1. október sl. hafi notkun pappírspersónuskilríkja í Egyptalandi verið lokið og héðan í frá verði íbúar landsins að nota sérstök rafræn persónuskilríki. Þetta hljómar svosem ekkert illa. Hvað er að því að koma sér inn í nútímann og taka upp rafræna stjórnsýsluhætti?

Persónuskilríkjum þessum framvísa Egyptar ef þeir vilja fá bankaþjónustu, fá atvinnu, afla sér menntunar, ferðast eða fá heilbrigðisþjónustu. Í raun er þetta skilríki bráðnauðsynlegt öllum vilji þeir eiga sér einhverja opinbera tilvist.

Einn hópur hefur ástæðu til að óttast við þessi umskipti. Það eru trúsystkini mín þar í landi, meðlimir Bahá'í samfélagsins í Egyptalandi. Þetta umrædda nafnskírteini tiltekur hvaða trú eigandinn aðhyllist, en aðeins er hægt að skrá ein þriggja viðurkenndra megintrúarbragða:  gyðingdóm, kristni eða islam. Ekki er gefinn kostur á að skrá neitt annað í reitinn, ekki einu sinni er gefinn kostur á að hann sé tómur. Þar sem bahá'í trúin telst vera sjálfstæð trúarbrögð og tilheyrir engum þessara trúarbragða fæst hún ekki skráð og röng skráning er ekki aðeins óásættanleg útfrá sannsöglissjónarmiðum bahá'ía heldur einnig refsiverð gagnvart egypskum landslögum.

Þann 4. apríl í fyrra kærðu nokkrir bahá'íar þessa ákvörðun og unnu málið fyrir stjórnsýsludómstóli í héraði sem kvað upp þann dóm að stjórnvöldum væri ekki heimilt að meina bahá'íum um að fá nafnskírteini. Þessi niðurstaða vakti mikla athygli hvarvetna nálægum löndum og mannréttindahópar fögnuðu niðurstöðinni. 

Harðlínuöfl landsins, þar á meðal Múslimska bræðralagið, hvöttu stjórnvöld til að áfrýja dómnum sem þau og gerðu. Æðsti stjórnsýsludómstóll landsins sneri svo úrskurðinum við í desember sama ár.

Í dag er það í höndum Mubarak Egyptalandsforseta að skerast í leikinn.

Vona ég innilega að hann finni ásættanlega lausn á þessu máli þannig að bahá'íar njóti fullra borgaralegra réttinda á við aðra íbúa landsins.

Nánar má lesa um málið hér. Einnig má horfa á myndskeið sem ég birti í eldri færslu.