Sumarskólinn

Jæja, þar kom að því að maður skrifaði nokkrar línur á bloggið sitt. Það er búið að vera brjálað að gera og því enginn tími til að blogga. Hér er smá skýrsla um sumarskólann:

Í byrjun ágúst fórum við á Sumarskóla bahá'ía sem haldinn var aftur í Hlíðardalsskóla. Þátttakan var mjög góð, um og yfir hundrað manns allan tímann sem náði hámmarki um helgina þegar um 140 manns mættu í kvöldverð á föstudagskvöldinu og tóku þátt í skemmtilegri kvölddagsskrá. 

Aðalfyrirlesari skólans var að þessu sinni Ian Semple, fyrrum meðlimur Allsherjarhúss réttvísinnar. Hann þjónaði þeirri stofnun frá upphafi, 1963 til 2005, þegar hann baðst lausnar sökum aldurs. Fyrirlestrarnir hans voru mjög áhugaverðir, a.m.k. þeir sem ég náði að sækja. Sá fyrri sem ég sótti (og reyndar túlkaði fyrir hann) fjallði um trúna sem brúarsmið (Our Faith as a Bridge Builder). Þar lærði ég að hugmyndin um trúna sem brú má rekja aftur til Rómar, en einn af titlum æðstaprests Rómar var Pontifex Maximus (aðalbrúarsmiður). Þennan titil hefur Páfinn nú eignað sér. Auðvitað ræddi hann um bahá'í trúna sem brúarsmið: Milli þjóða og kynþátta, milli vísinda og trúar o.s.fr.

Á þeim seinni sagði hann frá endurminningum sínum um bahá'í starfsemina frá því að hann gerðist bahá'íi árið 1949 þar til hann var kjörinn til setu í fyrsta Allsherjarhúsi réttvísinnar árið 1963. Það var mjög áhugavert að heyra hann segja frá sumum verkefnum sínum þegar hann fluttist til Haifa árið 1961 til að taka sæti í Alþjóðaráði bahá'ía (fyrirrennara Allsherjarhússins). Eitt verkefnið sem hann varð t.d. að ganga í var að laga þak pílagrímahússins sem byrjaði að leka um miðja nótt með þeim afleiðingum að einn pílagrími vaknaði um morguninn í herberginu sínu sem breyst hafði í lítið stöðuvatn

Því miður missti ég af restinni, þremur fyrirlestrum, en ég vonast til að heyra hljóðupptökur af þeim síðar. Erin tók að sér að skipuleggja föndur og pössun fyrir 0 - 3 ára ásamt öðrum foreldrum barna á þeim aldri. Einnig sá hún um barnakennslu 4 - 7 ára á laugardagsmorgun og þá var ég með litlu börnunum.

Annars verð ég að segja að lokum að andinn á þessum sumarskóla var einstakur. Það var eitthvað í loftinu. Bænastundirnar á kvöldin voru yndislegar og það var sungið alveg sérstaklega mikið. Það hefur satt að segja ekki mikið farið fyrir söng í Bahá'í samfélaginu á Íslandi undanfarin ár, en á þessum sumarskóla er eins og söng- og tilbeiðslulöngunin hafi vaknað af værum blundi. Það var yndislegt og greinilegt að margir fleiri upplifðu það sama, að þessi sumarskóli hafi verið einstaklega góður, að þeim í fyrra ólöstuðum.

 

 

Athugasemdir

[Mama G, 19.8.2008 kl. 20:59]

Já, íslensk náttúra að sumri til virðist hafa það í sér að draga fram það besta í fólki  Gaman að heyra frá þér aftur, it's been a while

[Una Þóra (IP-tala skráð) 23.8.2008 kl. 21:46]

Sæll Badí,

skemmtilegt að heyra hve sumarskólinn tókst vel til. Ég verð að drífa mig á hann að ári. Sætur litli peyinn þinn.

kærar kveðjur,

Una (...vonandi manstu eftir mér, annars verð ég bara ráðgáta eða gestaþraut sem er enn betra)

[Róbert Badí Baldursson, 26.8.2008 kl. 13:18]

Sæl Una og takk fyrir kveðjuna. Jú ég man eftir þér.