Fjórir bahá'íar handteknir í Jemen

Fréttavefur Alþjóðlega bahá'í samfélagsins (news.bahai.org) var rétt í þessu að birta frétt um fjóra bahá'ía sem nýverið voru handteknir í Jemen. Samkvæmt henni voru handtökurnar vegna trúarskoðana þeirra, en hingað til hefur hið 250 manna bahá'í samfélag í Jemen getað stundað trú sína hindrunarlaus svo lengi sem ekki fer mikið fyrir trúariðkuninni.

Þrír hinna fjögurra eru íranskir ríkisborgarar og kunna að verða framseldir til Íran þar sem bahá'íar eru ofsóttir. Sá fjórði er íraskur ríkisborgari sem kann að verða framseldur til Írak.

Handtökurnar fóru fram þann 20. júní sl. er um tuttugu vopnaðir öryggissveitarmenn réðust til inngöngu á nokkur heimili bahá'ía þar í höfuðborginni Sana'a og gerðu skjöl, tölvur og geisladiska upptæk.

Engar ákærur hafa verið gefnar út á hendur hinum handteknu en embættismenn hafa gefið í skyn að handtökurnar hafi farið fram vegna gruns um „trúboð“ sem fylgi ekki jemenskum lögum. Bahá'íarnir neita þessum ásökunum.

Ef Íranarnir þrír verða framseldir til Íran þar sem þeir kunna að sæta ofsóknum og pyntingum væri það brot á alþjóðlegum mannréttindalögum.

Ég verð að segja að það kemur mér á óvart að nú hafi þriðja landið bæst við þar sem stjórnvöld beita bahá'íum misrétti. Löndin þrjú sem það gera eru nú Íran, Egyptaland og Jemen.

Sjá nánar um málið hér.

Athugasemdir

[Mofi, 27.8.2008 kl. 20:55]

Áhugavert og takk fyrir að benda á þetta. Vill svo til að vinur minn og fyrrverandi mogga bloggari Jón Hjörleyfur er að fara til Jemen... Svona fréttir er ekki beint það sem manni langaði að heyra svona rétt fyrir brottför.